Беларускі фолк-метал-гурт Znich прыняў удзел у папулярным польскім тэлевізійным праекце Must Be the Music на канале Polsat. Нумар выклікаў бурную рэакцыю і велізарную падтрымку ў тэлегледачоў, пішуць Reform.news і MOST.
На сцэне польскага шоу талентаў беларускія музыкі выканалі кампазіцыю «Сягодня ў нас Купала». Артысты выйшлі да суддзяў у драўляных масках-крабошках, якія традыцыйна выкарыстоўваліся ў абрадах на Дзяды, а атмасферу на сцэне дапаўнялі запаленыя рытуальныя свечы — знічы. Вакалістка калектыву падрабязна патлумачыла журы сэнс песні і прызначэнне абрадавых масак.
Каб прайсці ў наступны этап праекта, удзельнікам неабходна атрымаць як мінімум тры галасы «так» ад суддзяў. Аднак выступленне беларусаў выклікала ў іх змешаныя пачуцці. Спявачка Наталля Шрэдэр прызналася, што нумар яе крыху напужаў, але пры гэтым яна адчула ў ім захапляльную першабытную магію — і прагаласавала за. Нечакана гурт падтрымаў і папулярны поп-выканаўца Давід Квяткоўскі, які высока ацаніў смеласць і прафесіяналізм музыкаў. А вось рэпер Miuosh і рок-музыка Себасцьян Карпель-Булэцка сказалі «не». З вынікам 2:2 беларускі калектыў не змог прайсці ў паўфінал.
У сацыяльных сетках рашэнне суддзяў узняла хвалю абурэння. Многія гледачы палічылі вердыкт несправядлівым, адзначаючы, што Znich моцна вылучаўся на фоне аднастайных салодкіх поп-спеваў і «пустых выступаў бягучага сезона», крытыкавалі суддзяў за празмерна стандартызаваны падыход. Некаторыя не хавалі эмоцый і пісалі: «Яны былі выдатныя!!! Не разумею вердыкту журы» і «Чаму гэта не прайшло? Гэта, верагодна, найлепшы метал-гурт з часу аднаўлення гэтай праграмы!». Многія прызнаваліся, што дадалі трэк у свае плэйлісты і зараз хочуць патрапіць на жывы канцэрт беларусаў.
Гурт Znich быў заснаваны ў Мінску ў 1996 годзе Алесем Таболічам. Калектыў быў адным з першапраходцаў айчыннай метал-сцэны, пачаў гарманічна спалучаць цяжкі рок з беларускім фальклорам і аўтэнтычнымі інструментамі. У 2016 годзе гурт удзельнічаў у нацыянальным адборы на «Еўрабачанне». Сам Таболіч вядомы таксама як мастак, майстар-татуіроўшчык і арганізатар фестываляў, а ў 2020 годзе вылучаўся ў прэзідэнты, але пазней зняў сваю кандыдатуру, заклікаўшы беларусаў аб’яднацца.
Зараз усе пяцёра ўдзельнікаў гурта жывуць і працуюць у Польшчы. Дарэчы, найбліжэйшы канцэрт беларусаў запланаваны на 20 чэрвеня ў Гдыні.